जन आवाज

२०८३ श्रावण २४, आईतवार २०:२१

कपिलवस्तु २४ साउन  । कपिलवस्तु प्रहरीले एयर पेस्तोल देखाउँदै स्थानीयलाई डरधम्की दिँदै हिँडेको आरोपमा तीन जनालाई पक्राउ गरेको छ।जिल्ला प्रहरी कार्यालय कपिलवस्तुका अनुसार २०८३ साल साउन २४ गते बिहान करिब २ बजे कृष्णनगर नगरपालिका–८ बहादुरगञ्जका स्थानीयलाई पेस्तोल देखाउँदै डरधम्की दिइरहेको सूचना प्राप्त भएको थियो।
सूचना पाएलगत्तै इलाका प्रहरी कार्यालय गणेशपुर र प्रहरी चौकी पत्थरदेहियाबाट खटिएको संयुक्त प्रहरी टोलीले खोजी गर्ने क्रममा विजयनगर गाउँपालिका–४, जगदीशपुरस्थित बाटोबाट पेस्तोलसहित तीन जनालाई नियन्त्रणमा लिएको हो।
पक्राउ पर्नेमा कृष्णनगर नगरपालिका–५ डबराका ३२ वर्षीय आशिष पाण्डे, कृष्णनगर नगरपालिका–८ का २१ वर्षीय जितेन्द्र मौर्या र सोही वडाका १९ वर्षीय विनोद कश्यप रहेका छन्।
प्रहरीले उनीहरूको साथबाट पेस्तोलजस्तो देखिने हतियार बरामद गरेको जनाएको छ। घटनाबारे थप अनुसन्धान भइरहेको जिल्ला प्रहरी कार्यालय कपिलवस्तुले जनाएको छ।
प्रहरीका अनुसार पक्राउ परेका व्यक्तिहरूमाथि हतियार तथा घटनाको प्रकृतिका सम्बन्धमा थप अनुसन्धान भइरहेको छ। अनुसन्धानपछि घटनामा प्रयोग भएको हतियारको वास्तविक प्रकृति तथा उनीहरूविरुद्ध लाग्ने कानुनी कारबाहीबारे थप स्पष्ट हुने प्रहरीले जनाएको छ।एयर पेस्तोल भनेको बारुद वा परम्परागत बन्दुकको गोली प्रयोग नगरी हावा वा CO₂ ग्यासको दबाबबाट पेलेट/छर्रा प्रहार गर्ने हतियार हो। यसको बनावट धेरैजसो वास्तविक पेस्तोलजस्तै हुने भएकाले सामान्य दृष्टिले छुट्याउन कठिन हुन सक्छ।